السلام عليكم.
من زمان ناويه ابدأ سلسله التركيز على ماركه معينه او منتج معين من مختلف الماركات.
او من جهه ثانيه يعتبر الكولكشن اللي عندي من الماركه الفلانيه.
حقيقه ان الصور مصورتها صار لي 10 شهور وللاسف خذني الوقت ولا نويت اشتغل ع البوست الا امس.
كنت اتهرب لانه يحتاج تركيز كبيرر وشغل كبير من تعديل وحقوق كتابه البوست :(
فكنت استنى الوقت المناسب عشان يكون ذهني صافي.
ماعلينا ماركتنا لليوم هي ايلف e.l..f
ماركه امريكيه. ماتتواجد الا بامريكا وكندا و اون لاين حسب ضني.
الماركه جدا جدا رخيصه! لكن ببعض المنتجات الكواليتي حقه ممتاز.
اسعارهم بالدولار تتراوح بين الدولار الى 15 دولار تقريبا للمجموعات او البالت.
لكن متوسط الاسعار عندهم ع 3 دولار او 5 تقريبا.
تعتبر ارخص من ماركات الدرق ستور ريميل وريفلون مثلا.
انا كان عندي من كم سنه منتجات منهم قليله.
وودي استكشف هالماركه واجرب اشياء اكثر !
لكن كان الحائل بيني وبين هالموضوع ان ماعندي بريد امريكي اشحن عليه.
واستخسر اطلب من متاجر والقطع بالاصل رخيصه! فماراح استفيد شي..
فلما طلعت بريد وبديت اتوسع بالطلب والمواقع شفت عرض في موقعهم. والنفسيه وقتها ال تعبانه ههههه :(
بدال مكنت اذاكر للميد تربعت قدام الاب وبديت اضيف للسله. مافيه شي ما طلبته والاغلب طلبته على عماي عشان اجربه.
اذكر اني قلت ل اختي ترا بطلب من موقع ايلف تبين شي ؟
قالت جيبي لي زيك في كل شي. قلت متاكده. ترا بطلب كثير. قالت ايه عادي جيبي زيك بالضبط هههههه
عاد يوم وصل الطلب مسكينه انفجعت قالت توقعت بتطلبين كثير لكن موب ل هالدرجه هههههه..
عاد مع مراعاه اني طلبت لها الاشياء اللي فعلا حسيت انها ممكن تستخدمها اما الاشياء التجارب ف كنت طالبه لي.
طولت عليكم.
المنتجات تقريبا عددهم 79 منتج.
اول شي نبدأ بمنتجات الوجه :
طلبت كم اساس منهم للتجربه.
اثنين ضاعوا للاسف وواحد لازال موجود.
صراحه تعليبه محترم جدا حسافته انه ضاع :( وانا ما استخدمته
هذا اللي لازال موجود صراحه ماجربته بشكل كافي عشان احكم عليه.
هذا اساس مضغوط ويجي معه اسفنجه و فيه مرايه. برذو ضايع. لكن اذكر انه ذكرني باساس من مايبيلين ماكان سيئ ابدا وخفيف
بلشراتهم من اكثر المنتجات اللي كنت متحممسه عليها.
وكثير يقارنونها ب نارس.
صراحه ظلم اننا نقارنها بنارس من ناحيه الكواليتي هههههه!!
لكن الشكل فعلا تذكرني بنارس جدا
زي مو شايفين عندي 7 الوان منهم.
بعضهم مافيها لون ابدا هههه!
بشكل عام البلشرات حقتهم حلوه لو انتي من الناس اللي ميزانيتك محدوده وتحبين اللوك الخفيف.
لاتتوقعين منها تكون بيقمنتد مره لا !
صبغتها مو عاليه يعني تحتاجين تعيدين عليه عشان يطلع لك اللون مو مثلا زي بلشرات الاماسكا. بطرف الفرشه واللون واضح ولا بعد تتوهقين انه كثير.
اتوقع انها ب 3 دولار.
يعني صراحه مره رخيصصه وتستحق تجربينها
هذي سواتش للالوان.
عني احب بلشنق روز لونه روز ترا هنا باين غامق عشاني حاطته باصبعي.
و بنك باشون حلو لطله صباحيه لو كنتي بيضا يعطيك طله البشره النديه المورده " علبو اني مو حاطه شي هههه"
و بيري ميري لونه جاي ع روز لكن فاتح.
ميلو موف و كاندد كورال خفيفين زي ماقلت لو كنتي تحبين الطله الخفيفه جدا
توينكل بنك و اللي فوقه استهبال ببساطه هههههه مافيه لوووووون !
بشكل عام بلشراتهم اعتقد انهم يناسبون الطلعات الخفيفه او للبيت او للبنات الصغار المتوسط والثانوي